मुंबई विशेष प्रतिनिधी:उपमुख्यमंत्री अजित पवार यांच्या निधनामुळे राज्याच्या राजकारणात निर्माण झालेली पोकळी भरून काढण्यासाठी महायुती आणि राष्ट्रवादी काँग्रेसने (अजित पवार गट) आक्रमक पावले उचलली आहेत. उद्या मुंबईत होणाऱ्या राष्ट्रवादीच्या आमदारांच्या तातडीच्या बैठकीत नव्या ‘विधीमंडळ पक्षनेत्याची’ निवड केली जाणार असून, सुनेत्रा पवार यांचे नाव या शर्यतीत आघाडीवर आहे. “बैठकीत एकमत झाल्यास उद्याच्या उद्याच शपथविधी होऊ शकतो,” या छगन भुजबळ यांच्या विधानाने राज्याच्या राजकीय वर्तुळात खळबळ उडवून दिली आहे.

‘शो मस्ट गो ऑन’: सत्तेच्या वारसाहक्कासाठी भुजबळांची रणनीती

अजितदादांच्या अकाली निधनानंतर पक्षावर कोसळलेले संकट मोठे असले तरी राजकीय अस्तित्व टिकवण्यासाठी सत्तेचा लगाम हाती घेणे गरजेचे असल्याचे मत ज्येष्ठ नेते छगन भुजबळ यांनी व्यक्त केले आहे. “दादा गेल्यानंतर झोप उडाली आहे, पण कुणाकडे तरी जबाबदारी सोपवावीच लागेल. सुनेत्रा वहिनींकडे नेतृत्व देण्याची मागणी रास्त असून विधीमंडळ पक्षनेते पदासाठी त्यांचे नाव योग्य आहे,” असे संकेत भुजबळांनी दिले आहेत. यातून अजितदादांच्या समर्थकांना आणि आमदारांना एकत्र ठेवण्यासाठी ‘पवार’ नावाचाच आधार घेण्याची रणनीती स्पष्ट होत आहे.

उद्याचा शपथविधी आणि राजकीय ‘हाय व्होल्टेज’ ड्रामा

सूत्रांच्या माहितीनुसार, उद्या होणारी ‘सीएलपी’ (विधीमंडळ पक्ष) बैठक केवळ नावाच्या चर्चेसाठी नसून ती सत्तेच्या अधिकृत दाव्यासाठी आहे. आमदारांच्या बैठकीत सुनेत्रा पवारांच्या नावावर शिक्कामोर्तब होताच, तातडीने राजभवनावर शपथविधी उरकून घेण्याच्या हालचाली सुरू आहेत. प्रफुल्ल पटेल आणि सुनील तटकरे यांनी या प्रक्रियेला वेग दिला असून, अधिवेशनापूर्वी पक्षात कोणतेही उभे फूट किंवा संभ्रम राहू नये, असा त्यांचा प्रयत्न आहे.

विधीमंडळ पक्षनेतेपदाचा पेच आणि सत्तेची गणिते

अजितदादा हे विधीमंडळातील एक प्रभावी नेतृत्व होते. त्यांच्या पश्चात विधीमंडळात विरोधकांचे हल्ले परतवून लावण्यासाठी आणि महायुतीत राष्ट्रवादीचे वजन टिकवून ठेवण्यासाठी कुणाकडे नेतृत्व द्यावे, हा मोठा प्रश्न होता. सुनेत्रा पवार यांच्या नावाला पसंती देऊन राष्ट्रवादीने सहानुभूतीसोबतच कुटुंबाकडेच नेतृत्व ठेवण्याचा पत्ता खेळला आहे. आता या बैठकीत सर्व आमदार ‘वहिनीं’च्या नावावर एका सुरात संमती देतात की काही छुपे विरोध समोर येतात, हे पाहणे औत्सुक्याचे ठरेल.

राजभवनावर उद्या नवी ‘पॉवर’ दिसणार?

अजितदादांच्या निधनानंतर अवघ्या ४८ तासांच्या आत नव्या उपमुख्यमंत्र्यांचा शपथविधी होणे, हे महाराष्ट्राच्या राजकारणातील सर्वात वेगवान घडामोडींपैकी एक ठरेल. मुख्यमंत्री देवेंद्र फडणवीस उद्याच्या मुहूर्ताला संमती देतात का आणि शरद पवार गट यावर काय प्रति-रणनीती आखणार, याकडे अवघ्या देशाचे लक्ष लागले आहे. उद्याचा दिवस राज्याच्या सत्तेची नवी दिशा ठरवणारा असेल.

—
Deepak Kaitke