नवी दिल्ली वृत्तसंस्था:दिल्लीहून पश्चिम बंगालमधील बागडोगरा येथे जाणाऱ्या इंडिगोच्या विमानात बॉम्ब असल्याची धमकी मिळाल्याने मोठी खळबळ उडाली. या धमकीच्या पत्रामुळे सुरक्षेचा प्रश्न निर्माण झाल्याने वैमानिकांनी तातडीने लखनौच्या चौधरी चरण सिंग आंतरराष्ट्रीय विमानतळावर विमानाचे आपत्कालीन लँडिंग केले. सुदैवाने, या घटनेत सर्व २३० प्रवासी आणि ७ क्रू मेंबर्स सुरक्षित आहेत.
इंडिगोचे फ्लाईट ६ई-६६५० सकाळी ७:४६ वाजता दिल्लीहून बागडोगरासाठी रवाना झाले होते. विमान हवेत असतानाच एका प्रवाशाला विमानातील वॉशरुममध्ये एक टिशू पेपर सापडला. या टिशू पेपरवर हाताने ‘विमानात बॉम्ब आहे’ असा संदेश लिहिलेला होता. प्रवाशाने ही बाब तातडीने क्रू मेंबर्सच्या लक्षात आणून दिली.
विमानातील कर्मचाऱ्यांनी ही गोपनीय माहिती वैमानिकांना दिली, ज्यांनी त्वरित एअर ट्रॅफिक कंट्रोलशी संपर्क साधला. सकाळी ८:४६ च्या सुमारास एटीसीला या धमकीची माहिती मिळाली. परिस्थितीचे गांभीर्य ओळखून विमान जवळच्या लखनौ विमानतळाकडे वळवण्याचा निर्णय घेण्यात आला. लखनौ विमानतळावर सकाळी ९:१७ वाजता विमानाचे सुरक्षित लँडिंग करण्यात आले.
