विशेष प्रतिनिधी | अलिबाग:नेहमी चर्चेत राहणारे महाराष्ट्र विधानसभा अध्यक्ष राहुल नार्वेकर यांचा एक खळबळजनक व्हिडिओ सध्या सोशल मीडियावर वाऱ्यासारखा पसरला आहे. या व्हिडिओमध्ये नार्वेकर आणि संतप्त गावकऱ्यांमध्ये जोरदार शाब्दिक चकमक उडाल्याचे दिसत असून, हे प्रकरण थेट ‘हाणामारी’पर्यंत पोहोचल्याची चर्चा राजकीय वर्तुळात रंगली आहे. या प्रकरणावरून आता विरोधकांनी नार्वेकरांना घेरण्यास सुरुवात केली आहे.
नेमकं काय घडलं म्हात्रोळीत?
रायगड जिल्ह्यातील अलिबाग तालुक्यातील म्हात्रोळी गावातील हा प्रकार असल्याचे सांगितले जात आहे. स्थानिक शेतकऱ्यांच्या मते, त्यांच्या शेतजमिनीची मोजणी करण्याचे काम कोणत्याही पूर्वसूचनेशिवाय आणि विश्वासात न घेता सुरू करण्यात आले होते. खुद्द विधानसभा अध्यक्ष या प्रक्रियेत सहभागी असल्याचे पाहून शेतकऱ्यांचा पारा चढला. शेतकऱ्यांनी नार्वेकरांना घेराव घालून प्रश्नांचा भडिमार केला, ज्यामुळे काही काळ तणावाचे वातावरण निर्माण झाले होते.
संजय राऊतांचे ‘ते’ ट्विट आणि खळबळ
शिवसेना (UBT) खासदार संजय राऊत यांनी हा व्हिडिओ शेअर करत थेट बॉम्ब टाकला आहे. राऊत यांनी आपल्या पोस्टमध्ये म्हटले आहे की, “विधानसभा अध्यक्षांसोबत ही हाणामारी कोठे आणि का झाली? राहुल नार्वेकर यांनी तेथून पळ काढला आहे! नेमकं काय सत्य आहे ते तुम्ही सांगताय की मी सांगू?” राऊतांच्या या विधानामुळे नार्वेकरांना तिथे नेमका कोणत्या प्रसंगाला सामोरे जावे लागले, याबाबतचे कुतूहल अधिकच वाढले आहे.
काँग्रेसचा कडाडून हल्ला
याच प्रकरणावर काँग्रेस प्रदेशाध्यक्ष हर्षवर्धन सपकाळ यांनीही आक्रमक भूमिका घेतली आहे. त्यांनी असा दावा केला आहे की, शेतकऱ्यांच्या जमिनी बळकावण्यासाठी किंवा मोजणीसाठी नार्वेकर तिथे ‘दादागिरी’ करत होते. मात्र, गावकऱ्यांच्या एकजुटीपुढे त्यांचा निभाव लागला नाही आणि त्यांना तिथून निघून जावे लागले. शेतकऱ्यांच्या विरोधापुढे झुकून अध्यक्षांना माघार घ्यावी लागल्याचा दावा सपकाळ यांनी केला आहे.
सत्य की अफवा?
व्हायरल होत असलेल्या या व्हिडिओमध्ये बाचाबाची स्पष्टपणे दिसत असली, तरी त्याचं रूपांतर हाणामारीत झालं होतं का? आणि या मोजणीमागचं नेमकं कारण काय होतं? हे अद्याप अधिकृतपणे स्पष्ट झालेलं नाही. राहुल नार्वेकर यांच्याकडून या प्रकरणावर काय स्पष्टीकरण येतं, यावर आता या प्रकरणाचं सत्य अवलंबून आहे.