विशेष प्रतिनिधी:जिल्हा परिषद आणि पंचायत समितीच्या आगामी सार्वत्रिक निवडणुकीसाठी पुणे जिल्हा प्रशासन ‘ॲक्शन मोड’मध्ये आले असून, निवडणूक कामकाजासाठी तब्बल २३ हजार ११४ अधिकारी व कर्मचाऱ्यांची नियुक्ती करण्यात आली आहे. जिल्हाधिकारी तथा जिल्हा निवडणूक अधिकारी जितेंद्र डुडी यांनी या अवाढव्य मनुष्यबळाच्या नियुक्तीची घोषणा केली असून, १३ तालुक्यांमध्ये निवडणुकीची प्रशासकीय तयारी अंतिम टप्प्यात पोहोचली आहे.

तालुकानिहाय फौजफाटा सज्ज

जिल्ह्यातील १३ तालुक्यांच्या भौगोलिक विस्तारानुसार कर्मचाऱ्यांचे वाटप करण्यात आले आहे. यामध्ये इंदापूर तालुक्यात सर्वाधिक २,६३२ कर्मचारी नियुक्त करण्यात आले आहेत, तर त्यापाठोपाठ जुन्नर (२,४११) आणि शिरूर (२,१९०) या तालुक्यांचा क्रमांक लागतो. सर्वात कमी ४५० कर्मचाऱ्यांची नियुक्ती वेल्हे तालुक्यासाठी करण्यात आली आहे.

कुठे किती मनुष्यबळ? (प्रमुख तालुके):

इंदापूर: २,६३२
जुन्नर: २,४११
शिरूर: २,१९०
बारामती: १,९४५
हवेली: १,८००
मावळ: १,६१२
प्रशासकीय यंत्रणा सतर्क

निवडणूक प्रक्रिया अत्यंत पारदर्शक आणि शांततेत पार पाडण्यासाठी प्रशासनाने हे पाऊल उचलले आहे. नियुक्त करण्यात आलेल्या २३ हजार कर्मचाऱ्यांमध्ये केंद्रप्रमुख, मतदान अधिकारी आणि इतर सहाय्यक कर्मचाऱ्यांचा समावेश आहे. लवकरच या कर्मचाऱ्यांच्या प्रशिक्षणाचे टप्पे सुरू होणार असल्याचे संकेत प्रशासनाकडून मिळाले आहेत.

जिल्हा परिषद आणि पंचायत समितीच्या या निवडणुकांकडे संपूर्ण राज्याचे लक्ष लागून असल्याने, इतक्या मोठ्या प्रमाणावरील मनुष्यबळाचे नियोजन हे जिल्हा प्रशासनासाठी मोठे आव्हान ठरणार आहे.

—
Deepak Kaitke