मुंबई: राज्याच्या अर्थसंकल्पीय अधिवेशनाचा तिसरा आठवडा अत्यंत महत्त्वाच्या चर्चांनी गाजणार असतानाच, आज सकाळी विधानभवन परिसरात एका अनामिक ईमेलने प्रचंड खळबळ उडवून दिली. “विधानभवनात बॉम्ब ठेवला आहे,” असा निरोप देणारा हा ईमेल सकाळी ८:३० ते ९ च्या सुमारास धडकला आणि काही क्षणांतच मंत्र्यांपासून ते कर्मचाऱ्यांपर्यंत सर्वांची धावपळ उडाली. विशेष म्हणजे, आज सकाळी विधिमंडळाचे विशेष सत्र (Special Sitting) नियोजित असल्याने अनेक आमदार आणि मंत्री वेळेपूर्वीच उपस्थित होते.
धमकी मिळताच सुरक्षा यंत्रणांनी क्षणाचाही विलंब न लावता संपूर्ण इमारतीचा ताबा घेतला. ‘बॉम्ब शोधक व नाशक पथक’ आणि श्वान पथकाने विधानभवनाच्या प्रत्येक दालनाची झडती घेण्यास सुरुवात केली आहे. सुरक्षेच्या कारणास्तव कर्मचारी आणि अधिकाऱ्यांना इमारतीच्या प्रवेशद्वारावरच थांबवण्यात आले असून, कोणालाही आत प्रवेश दिला जात नाहीये. उपमुख्यमंत्री सुनेत्रा पवार यांनी या घटनेला दुजोरा दिला असून, पोलीस दल परिस्थितीवर बारीक लक्ष ठेवून असल्याची माहिती दिली आहे.
अधिवेशनाच्या धामधुमीत विधानभवनासारख्या अतिसंवेदनशील ठिकाणी अशा प्रकारे धमकी मिळणे, ही सुरक्षा यंत्रणांसमोर मोठी आव्हानं निर्माण करणारी बाब आहे. हा ईमेल खोडसाळपणा आहे की घातपाताचा प्रयत्न, याचा तपास सायबर गुन्हे शाखा करत आहे. तोपर्यंत विधानभवन परिसराला छावणीचे स्वरूप आले असून, तपास पूर्ण होईपर्यंत सर्व कामकाज थांबवण्यात आले आहे.