मुंबई, विशेष प्रतिनिधी :”अजित पवार यांच्या अपघाती निधनाचा तपास जर थातूरमातूर केला, तर मराठी माणूस काय असतो हे तपास यंत्रणांना दाखवून द्यावे लागेल,” अशा कडक शब्दांत आमदार रोहित पवार यांनी आपला संताप व्यक्त केला आहे. अजित पवार यांच्या निधनानंतर उपस्थित होत असलेल्या संशयास्पद प्रश्नांमुळे महाराष्ट्राच्या राजकारणात आता मोठी खळबळ उडाली आहे.

तपासाच्या ‘त्या’ वळणावर संशय

रोहित पवार यांनी या संपूर्ण प्रकरणातील तपासावर गंभीर प्रश्नचिन्ह उपस्थित केले आहेत. “दोन रिपोर्ट आले असले तरी सर्वात महत्त्वाचा रिपोर्ट अद्याप का लपवला जात आहे? ऐनवेळी वैमानिक बदलण्याचे कारण काय होते? राज्याची सीआयडी (CID) आतापर्यंत नेमके काय काम करत होती?” असे एकामागून एक टोकदार प्रश्न त्यांनी विचारले आहेत. सीबीआय चौकशीला वेळ लागत असला तरी, तपासात पारदर्शकता असावी हीच जनतेची आणि अमोल मिटकरी, रुपाली ठोंबरे यांच्यासारख्या कार्यकर्त्यांची भावना असल्याचे त्यांनी स्पष्ट केले.

राजकीय समीकरणे आणि शरद पवारांची भूमिका

केवळ तपासच नव्हे, तर आगामी राजकीय रणनीतीबाबतही रोहित पवारांनी महत्त्वाची विधाने केली आहेत. “आमचे नेते या अधिवेशनासह आगामी सर्व राजकीय प्रवासात ‘राष्ट्रवादी काँग्रेस शरदचंद्र पवार’ पक्ष आणि महाविकास आघाडी म्हणून एकसंध राहतील,” असे सांगून त्यांनी युती भक्कम असल्याचे संकेत दिले.

विशेष म्हणजे, राज्यसभेच्या उमेदवारीबाबत बोलताना त्यांनी एक जुनी आठवण करून दिली. “खुद्द अजित पवार यांचीही इच्छा होती की शरद पवारांनी राज्यसभेत जावे. जर आता शरद पवार स्वतः इच्छुक असतील, तर महाविकास आघाडीचा त्यांना पूर्ण पाठिंबा असेल,” असे मोठे विधान त्यांनी केले आहे. मात्र, यावर अद्याप आघाडीची अधिकृत बैठक होणे बाकी असल्याचेही त्यांनी नमूद केले.

अजित पवारांच्या निधनाचे सावट आणि तपासातील त्रुटींमुळे निर्माण झालेला हा संशयाचा धूर आगामी काळात राज्य सरकारसाठी मोठी डोकेदुखी ठरण्याची शक्यता आहे.

—
Deepak Kaitke