नाशिकसह, धुळे, अहिल्यानगर, जळगाव महापालिकेसाठी ६ तर मालेगावसाठी ७ फेब्रुवारीला विशेष बैठक
नाशिक । अवघ्या शहर-जिल्ह्याचेच नव्हे तर राज्याचे लक्ष वेधलेल्या नाशिक महापालिकेच्या महापौर-उपमहापौरांची निवड ६ फेब्रुवारी रोजी होणार आहे. याशिवाय धुळे, अहिल्यानगर आणि जळगाव महारापालिकेच्या महापौर आणि उपमहापौरपदाचीही निवड दि. ६ फेब्रुवारी रोजी सकाळी ११ वाजता होणार आहे. मालेगाव महापालिकेच्या महापौर-उपमहापौर निवडीसाठी ७ फेब्रुवारी रोजी सकाळी ११ वाजता निवड होणात आहे.
संबंधित महापालिकेच्या सभागृहात विशेष बैठक आयोजित करण्याचे निर्देश विभागीय आयुक्त डॉ. प्रवीण गेडाम यांनी दिले आहेत. महापालिकेच्या महापौर आणि उपमहापौरपदाच्या निवडणुकीसाठी विशेष बैठकीचे पीठासीन अधिकारी म्हणून विभागीय आयुक्त किंवा त्यांचा प्रतिनिधी असेल, अशी तरतूद आहे. त्या अनुषंगाने संबंधित जिल्ह्यातील जिल्हाधिकाऱ्यांनी पीठासीन अधिकारी म्हणून काम पाहण्याचे आदेशात नमूद करण्यात आले आहे. नवनिर्वाचित सदस्यांमधून नाशिक महानगरपालिकेच्या महापौर व उपमहापौर यांच्या निवडीसाठी ६ फेब्रुवारी रोजी सकाळी ११ वाजता नाशिक महापालिका सभागृहात विशेष बैठक आयोजित करण्यात आली असून, विभागीय आयुक्त यांचे प्रतिनिधी म्हणून जिल्हाधिकारी आयुष प्रसाद यांची पीठासीन अधिकारी म्हणून नियुक्ती करण्यात आली आहे.
नवनिर्वाचित सदस्यांमधून धुळे महापालिकेच्या महापौर व उपमहापौर यांच्या निवडीसाठी धुळे महापालिका सभागृहात विशेष बैठक आयोजित करण्यात आली असून, विभागीय आयुक्त यांच्या प्रतिनिधी म्हणून जिल्हाधिकारी भाग्यश्री विसपुते यांची पीठासीन अधिकारी म्हणून नियुक्ती करण्यात आली आहे. अहिल्यानगर महापालिकेच्या महापौर व उपमहापौर यांच्या निवडीसाठी अहिल्यानगर महापालिका सभागृहात विशेष बैठक आयोजित करण्यात आली असून विभागीय आयुक्त यांचे प्रतिनिधी म्हणून जिल्हाधिकारी डॉ. पंकज आशिया यांची पीठासीन अधिकारी म्हणून नियुक्ती करण्यात आली आहे.
जळगाव महापालिकेच्या महापौर व उपमहापौर निवडीसाठी जळगाव महापालिका सभागृहात विशेष बैठक आयोजित करण्यात आली असून, विभागीय आयुक्त यांचे प्रतिनिधी म्हणून जिल्हाधिकारी रोहन घुगे यांची पीठासीन अधिकारी म्हणून नियुक्ती करण्यात आली आहे तर नवनिर्वाचित सदस्यांमधून मालेगाव महापालिकेच्या महापौर व उपमहापौर यांच्या निवडीसाठी ७ फेब्रुवारी रोजी सकाळी ११ वाजता मालेगाव महापालिका सभागृहात विशेष बैठक आयोजित करण्यात आली असून, विभागीय आयुक्त यांचे प्रतिनिधी म्हणून नाशिक जिल्हाधिकारी आयुष प्रसाद यांची पीठासीन अधिकारी म्हणून नियुक्ती करण्यात आली आहे. पीठासीन अधिकारी यांनी महाराष्ट्र महानगरपालिका अधिनियम १९४९ मधील तरतुदींचे पालन करुन सभेचे कामकाज पार पाडावे तसेच बैठकीचे इतिवृत्त महानगरपालिकेच्या इतिवृत्त नोंदवहीत नोंदवून सविस्तर अहवाल सादर करावा, असे आदेशात नमूद करण्यात आले आहे.
