रामटेक ( प्रतिनिधी )रामटेक नगरपरिषदेच्या वतीने ६ जानेवारी रोजी पत्रकार दिनानिमित्त नगरपरिषद सभागृहात पत्रकारांचा सन्मान करण्यात आला. कार्यक्रमाच्या अध्यक्षस्थानी नगराध्यक्ष बिकेंद्र महाजन होते. यावेळी नगरपरिषद प्रशासनाच्या वतीने पत्रकारांना डायरी, पेन व गुलाबपुष्प देऊन सन्मानित करण्यात आले.

कार्यक्रमाला मुख्याधिकारी पल्लवी राऊत,नगरसेवक सुमित कोठारी,विश्वास पाटील,अमित अंबादे, बांधकाम अभियंता सौरभ कावळे, सिटी को-ऑर्डिनेटर अपेक्षा नाहरकर,नगररचना विभागाच्या देवर्षी उईके, ओमकार कुलकर्णी यांच्यासह नगरपरिषदेचे अधिकारी व कर्मचारी उपस्थित होते.

याप्रसंगी नगराध्यक्ष बिकेंद्र महाजन यांनी पत्रकार हे लोकशाहीचे चौथे स्तंभ असून समाज व प्रशासन यांच्यातील दुवा असल्याचे प्रतिपादन केले. शहरातील विकासकामे, नागरिकांच्या समस्या व जनहिताच्या विषयांना वाचा फोडण्याचे काम पत्रकार करत असल्याबद्दल त्यांनी समाधान व्यक्त केले.

कार्यक्रमादरम्यान पत्रकारांनीही शहरातील विविध नागरी समस्या, मूलभूत सुविधा व विकासासंदर्भातील मुद्दे मांडले. यावर नगराध्यक्षांनी सकारात्मक चर्चा करत योग्य त्या उपाययोजना करण्याचे आश्वासन दिले.

कार्यक्रमाचे सूत्रसंचालन बांधकाम अभियंता सौरभ कावळे यांनी केले तर आभारप्रदर्शन मुख्याधिकारी पल्लवी राऊत यांनी केले.