रामटेक ( प्रतिनिधी )समाजातील वंचित घटक, पर्यावरण संवर्धन आणि वन्यजीव संरक्षणासाठी निःस्वार्थपणे कार्य करणाऱ्या वाइल्ड चॅलेंजर ऑर्गनायझेशन संस्था, रामटेकचे सचिव सर्पमित्र – प्राणीमित्र अजय मेहरकुळे यांना ‘विदर्भवीर पुरस्काराने’ सन्मानित करण्यात आले. हा गौरव सोहळा वाइल्ड लाईफ वेलफेअर सोसायटी, नागपूर यांच्या वतीने आयोजित करण्यात आला होता.
अजय मेहरकुळे यांनी गेल्या अनेक वर्षांपासून सामाजिक जाणीव ठेवत विविध उपक्रम राबविले आहेत. सर्पदंश झालेल्या अनेकांचे त्यांनी प्राण वाचविले. वन्यप्राणी संरक्षणाबरोबरच पर्यावरण जागृती, वृक्षारोपण, सामाजिक आपत्तीच्या काळात मदतकार्य तसेच नागरिकांमध्ये संवेदनशीलता निर्माण करण्यासाठी व अपघात झालेल्या रुग्णाला रुग्णवाहिकेची सेवा देत त्यांनी मोलाचे योगदान दिले आहे. त्यांच्या या सातत्यपूर्ण समाजसेवेची दखल घेत हा पुरस्कार प्रदान करण्यात आला.
कार्यक्रमाला सामाजिक, पर्यावरणीय आणि स्वयंसेवी क्षेत्रातील मान्यवरांची उपस्थिती होती. पुरस्कार स्वीकारताना अजय मेहरकुळे यांनी हा सन्मान समाजकार्यात सहभागी असलेल्या प्रत्येक कार्यकर्त्याचा असल्याचे सांगत, भविष्यातही समाज आणि निसर्गाच्या रक्षणासाठी अधिक व्यापक पातळीवर काम करण्याचा निर्धार व्यक्त केला.
या सन्मानामुळे रामटेक परिसरातील सामाजिक कार्यकर्त्यांना नवी प्रेरणा मिळाली असून, समाजोपयोगी कार्याची चळवळ अधिक बळकट होईल, असा विश्वास उपस्थित मान्यवरांनी व्यक्त केला. अजय मेहरकुळे यांच्या या उल्लेखनीय कार्याबद्दल सर्वत्र अभिनंदन होत आहे.
