मुंबई, दि. ९ प्रतिनिधी:शुक्रवारीही शेअर बाजारातील घसरणीचा क्रम कायम राहिला असून सलग पाचव्या दिवशी बाजार घसरणीसह बंद झाला. अमेरिकेकडून संभाव्य टॅरिफ लावले जाण्याच्या भीतीमुळे गुंतवणूकदार चिंतेत होते, तसेच येणाऱ्या दुसऱ्या तिमाहीतील कंपन्यांच्या निकालापूर्वी ते सावध भूमिका घेत होते. याशिवाय परदेशी गुंतवणूकदारांकडून बाजारातून पैसे काढणे सुरूच राहिल्याने गुंतवणूकदारांचा विश्वास डळमळीत झाला.
शुक्रवारी सेन्सेक्सने ८४,०२२ अंकांवर व्यवहाराची सुरुवात केली आणि दिवसअखेरीस ०.७२ टक्क्यांची घसरण नोंदवत तो ८३,५७६ अंकांवर बंद झाला. तर निफ्टी ५० ने २५,८८३ अंकांवर ओपनिंग दिली आणि दिवसअखेरीस ०.७५ टक्क्यांच्या घसरणीसह तो २५,४८९* अंकांवर बंद झाला.
बेंचमार्क निर्देशांकांच्या तुलनेत मिडकॅप आणि स्मॉलकॅप निर्देशांकांची कामगिरी अत्यंत खराब राहिली. बीएसई मिडकॅपमध्ये ०.८९ टक्क्यांची, तर बीएसई स्मॉलकॅपमध्ये १.७३ टक्क्यांची घसरण नोंदवण्यात आली.
निफ्टी ५० मधील कंपन्यांमध्ये सर्वाधिक वाढ एशियन पेंट्समध्ये पाहायला मिळाली असून या शेअरमध्ये १.४० टक्क्यांची वाढ झाली. त्यानंतर ओएनजीसीमध्ये १.१६ टक्के, एचसीएल टेकमध्ये ०.९० टक्के, भारत इलेक्ट्रॉनिक्समध्ये ०.७३ टक्के आणि सिप्लामध्ये ०.३५ टक्क्यांची वाढ नोंदवली गेली.
निफ्टी ५० मधील कंपन्यांमध्ये सर्वाधिक नुकसान अदानी एंटरप्रायझेसला झाले असून या शेअरमध्ये २.७३ टक्क्यांची घसरण झाली. त्यापाठोपाठ एनटीपीसीमध्ये २.४४ टक्के, जिओ फायनान्शियल सर्व्हिसेसमध्ये २.१५ टक्के, आयसीआयसीआय बँकेत २.१४ टक्के आणि बजाज ऑटोमध्ये २.०३ टक्क्यांची घसरण नोंदवण्यात आली.
सेक्टरल निर्देशांकांमध्ये निफ्टी ऑईल अँड गॅसमध्ये ०.४० टक्के, निफ्टी आयटीमध्ये ०.२८ टक्के आणि निफ्टी पीएसयू बँकेत ०.१८ टक्क्यांची वाढ झाली, तर बहुतेक इतर क्षेत्रे घसरणीत बंद झाली. यामध्ये निफ्टी रिअल्टीमध्ये सर्वाधिक २.२६ टक्क्यांची घसरण झाली, त्यापाठोपाठ निफ्टी कॅपिटल मार्केट २.०४ टक्के, निफ्टी इंडिया टूरिझम १.३८ टक्के, निफ्टी ऑटो १.१५ टक्के, निफ्टी एफएमसीजी १.०८ टक्के, निफ्टी इंडिया कन्झ्युमर १.०६ टक्के, निफ्टी फायनान्शियल सर्व्हिसेस १.०५ टक्के, निफ्टी प्रायव्हेट बँक ०.९५ टक्के, निफ्टी सर्व्हिसेस सेक्टर ०.९३ टक्के, निफ्टी एनर्जी ०.९२ टक्के, निफ्टी फार्मा ०.८८ टक्के, निफ्टी इन्फ्रा ०.८५ टक्के, निफ्टी मीडिया ०.८४ टक्के आणि निफ्टी कमोडिटीज ०.७४ टक्क्यांनी घसरले.
