पुण्यामध्ये महानगरपालिकेच्या निवडणुकीच्या प्रचारासाठी मनसेचा रोड शो शहरातील प्रमुख मार्गांवर आयोजित करण्यात आला होता. मुख्यमंत्री देवेंद्र फडणवीस यांची सभा जिथे आयोजित करण्यात आली होती तेथे मनसेची रॅली पोहोचल्यानंतर पोलिसांनी त्यांना मज्जाव केल्यानंतर मनसे कार्यकर्ते आणि भाजप कार्यकर्त्यांमध्ये राडा निर्माण झाला. निवडणुकीच्या शेवटच्या दिवशी निर्माण झालेल्या या वादामुळे मोठी खळबळ निर्माण झाली आहे.
भाजप कार्यकर्ते आणि मनसे कार्यकर्ते एकमेकांसमोर आल्यानंतर त्यांच्यामध्ये सुरुवातीला शाब्दिक चकमक झाली. याचे रूपांतर नंतर धक्काबुक्की आणि एकमेकांविरोधी घोषणाबाजी मध्ये झाली. कार्यकर्त्यांमध्ये हा वाद उफाळताच पोलिसांना पाचारण करण्यात आले आणि पोलिसांच्या हस्तक्षेपानंतर परिस्थिती आटोक्यात आणण्यात आली.
