बदलापूर, दि.१४,प्रतिनिधी:डॉ. जितेंद्र आव्हाड फाऊंडेशन व राष्ट्रवादी काँग्रेस शरदचंद्र पवार पक्षाचे प्रदेश सरचिटणीस अविनाश देशमुख यांच्या संकल्पनेतून बदलापूर शहरात पत्रकार दिनानिमित्त पत्रकारांचा सन्मान सोहळा आयोजित करण्यात आला. कार्यक्रमात शहरातील प्रिंट व इलेक्ट्रॉनिक माध्यमातील पत्रकारांचा गौरव करण्यात आला.
विविध मान्यवरांच्या उपस्थितीत पारंपरिक वातावरणात हा कार्यक्रम पार पडला.डॉ. जितेंद्र आव्हाड फाऊंडेशनच्या वतीने आणि राष्ट्रवादी काँग्रेस शरदचंद्र पवार पक्षाचे प्रदेश सरचिटणीस अविनाश देशमुख यांच्या संकल्पनेतून पत्रकार दिनाचे औचित्य साधत बदलापूर शहरातील पत्रकारांसाठी सन्मान सोहळ्याचे आयोजन करण्यात आले होते. या कार्यक्रमात बदलापूर शहरातील विविध वृत्तपत्रे तसेच इलेक्ट्रॉनिक माध्यमांतील पत्रकारांचा सन्मान करण्यात आला.
अविनाश देशमुख यांनी यापूर्वी समाजोपयोगी अनेक उपक्रम राबवले असून त्यामध्ये पोलीस कर्मचाऱ्यांसाठी मोफत आरोग्य शिबिर, दिवाळीनिमित्त गरजू नागरिकांना शारदाचा शिधा वाटप, खासदार सुप्रिया सुळे यांच्या वाढदिवसानिमित्त मातांना बेबी केअर किट वाटप, शरदचंद्र पवार यांच्या ८६ व्या वाढदिवसानिमित्त यशवंतराव चव्हाण सेंटर येथे ८६ किलो लाडू वाटप, बदलापूर–अक्कलकोट व बदलापूर–शेगाव बससेवा सुरू करणे आदी उपक्रमांचा समावेश आहे.तसेच, शेतकऱ्यांच्या अडचणी लक्षात घेऊन थेट शेताच्या बांधावर जाऊन कर्जफेड करण्याचा सामाजिक उपक्रम राबवण्यात आला.
लातूर जिल्ह्यातील हडोळती येथील वृद्ध शेतकरी दाम्पत्याने बैलांअभावी स्वतःला जुंपून नांगरणी केल्याचा व्हिडिओ राज्यभर व्हायरल झाल्यानंतर त्या दाम्पत्याची भेट घेऊन त्यांच्या नावावरील जिल्हा बँकेचे संपूर्ण कर्ज अविनाश देशमुख यांनी फेडले व त्यांना बैलजोडी विकत घेऊन दिली.
या पत्रकार सन्मान सोहळा कार्यक्रमाचे सूत्रसंचालन बिना देवधर यांनी केले.
यावेळी कार्यक्रमाला प्रमुख पाहुणे म्हणून बदलापूर शहराचे प्रथम नागरिक नगराध्यक्षा रुचिता घोरपडे,उपनगराध्यक्षा प्रियांका दामले, मुख्याधिकारी मारुती गायकवाड बदलापूर शहर पत्रकार संघ तथा झी २४ तास चे चंद्रशेखर भुयार, बदलापूर प्रेस क्लब तथा पुण्यनगरीचे विजय पंचमुख,रा.श.प.पक्षाचे मुरबाड तालुका अध्यक्ष दिपक वाघचौरे, अभिषेक दुनकवाल हे लाभले. उपस्थित मान्यवरांनी आचार्य बाळशास्त्री जांभेकर यांच्या प्रतिमेस पुष्पहार अर्पण करून अभिवादन केले.
मंचावरील मान्यवरांनी आपल्या भाषणातून पत्रकार दिनाचा इतिहास सांगत पत्रकारांच्या समाजातील भूमिकेवर प्रकाश टाकला. यावेळी अविनाश देशमुख यांनी पत्रकारांच्या प्रामाणिक आणि मेहनती कार्याची प्रशंसा करत सर्व पत्रकारांचा पुष्पगुच्छ व भेटवस्तू देऊन सन्मान केला.
या कार्यक्रमास शहरातील बहुसंख्य पत्रकार बांधव, ज्येष्ठ पत्रकार तसेच महिला पत्रकार मोठ्या संख्येने उपस्थित होते.
