विशेष प्रतिनिधी:सातारा जिल्हा परिषद आणि पंचायत समिती निवडणुकीच्या निकालांनी जिल्ह्याच्या राजकारणात मोठी उलथापालथ घडवून आणली आहे. प्रस्थापित नेत्यांना आणि त्यांच्या नातेवाईकांना घरी धाडून मतदारांनी विकासाला आणि नव्या चेहऱ्यांना पसंती दिल्याचे स्पष्ट झाले आहे. विशेषतः मंत्री मकरंद पाटील यांना त्यांच्याच बालेकिल्ल्यात मोठा धक्का बसला असून, महाबळेश्वरच्या तळदेव गटात शिवसेनेच्या (शिंदे गट) अजित सपकाळ यांनी राष्ट्रवादीच्या उमेदवाराचा पराभव करत पाटलांच्या वर्चस्वाला सुरुंग लावला आहे.

माण तालुक्यातही मंत्री जयकुमार गोरे यांचे बंधू अरुण गोरे पिछाडीवर राहिल्याने भाजपसाठी हा निकाल धोक्याची घंटा मानला जात आहे. मात्र, खटावमध्ये आमदार महेश शिंदे यांच्या पत्नी डॉ. प्रिया शिंदे यांनी विजय मिळवून भाजपची अब्रू राखली. लिंब गणातही भाजपच्या तिन्ही उमेदवारांनी निर्भेळ यश संपादन केले आहे. तर दुसरीकडे, राष्ट्रवादीने खेड आणि वाठार स्टेशनसारख्या गटांत आपले वर्चस्व कायम राखत कामेश कांबळे आणि जयश्री भोसले यांना विजयी केले आहे.

या निवडणुकीत मुख्यमंत्री एकनाथ शिंदे यांच्या शिवसेनेने कुंभरोशी गणातून खाते उघडले असून, त्यांचे खंदे समर्थक संजयराव मोरे यांनी बाजी मारली आहे. म्हसवे गटात भाजपचे वसंतराव मानकुमरे यांनी दोन हजारांहून अधिक मतांनी विजय मिळवला, तर सातारा पंचायत समितीमध्ये राष्ट्रवादीच्या राजेश पवारांनी विजय मिळवून आपली पकड घट्ट केली आहे. एकूणच, या निकालांनी आगामी विधानसभा निवडणुकीपूर्वी जिल्ह्याचे राजकीय पारडे कोणाकडे झुकेल, याचे संकेत दिले आहेत.