विशेष प्रतिनिधी:अजित पवार यांच्या विमान अपघाताचे प्रकरण आता केवळ तांत्रिक बिघाडापुरते मर्यादित राहिले नसून, त्याला एका मोठ्या राजकीय षडयंत्राचे स्वरूप प्राप्त होताना दिसत आहे. आमदार रोहित पवार यांनी यासंदर्भात खळबळजनक गौप्यस्फोट करत, हा साधा अपघात नसून एक सुनियोजित ‘घातपात’ असल्याचा संशय व्यक्त केला आहे. आजच्या विशेष पत्रकार परिषदेत त्यांनी मांडलेल्या तर्कसंगत पुराव्यांनी आणि ‘मोसाद’च्या कार्यपद्धतीशी केलेल्या तुलनेने सर्वांच्याच काळजाचा ठोका चुकला आहे.
रोहित पवार यांनी या प्रकरणाला आंतरराष्ट्रीय परिमाण देताना धक्कादायक माहिती दिली. ते म्हणाले, “इस्रायलची गुप्तचर संस्था ‘मोसाद’चे माजी प्रमुख डेगन यांची एक क्रूर पद्धत होती—जर मुख्य लक्ष्याला संपवायचे असेल, तर त्याच्या चालकाला (पायलटला) संपवा. अजितदादांच्या बाबतीतही असंच काहीसं घडलंय का? आम्हाला यामागे मोठ्या शक्तीचा हात असल्याची शंका आहे.” या दाव्यामुळे आता सुरक्षा यंत्रणा आणि राजकीय वर्तुळात प्रचंड खळबळ उडाली आहे.
पूर्व विदर्भातील ‘तो’ बडा नेता रडारवर!
२७ जानेवारीच्या दुर्दैवी प्रवासाच्या काही तास आधी घडलेल्या घटनाक्रमावर रोहित पवारांनी प्रकाश टाकला. त्यांच्या दाव्यानुसार:
गाडीचा प्रवास रद्द का झाला? अजितदादा सुरुवातीला रस्तेमार्गे जाणार होते, परंतु त्यांना मुद्दाम थांबवण्यात आले.
विदर्भातील ‘मिस्ट्री मॅन’ कोण? पूर्व विदर्भातील एक वजनदार नेता दादांना भेटण्यासाठी उशिरा आला, ज्यामुळे त्यांचा वेळ दवडला गेला.
‘त्या’ फाईलची सही महागात पडली? मंत्रालयात अडकलेली एक ‘अति-महत्त्वाची’ फाईल सहीसाठी मुद्दाम उशिरा मागवण्यात आली का? ट्रॅफिकचे कारण देऊन फाईल येईपर्यंत दादांना थांबवण्यात आले आणि याच दिरंगाईमुळे त्यांना अखेर विमानाने जाण्याचा निर्णय घ्यावा लागला.
मोबाईल रेकॉर्ड तपासा, सत्य बाहेर येईल!
“अजितदादांचे मोबाईल रेकॉर्ड आणि त्या दिवशी त्यांच्या संपर्कात आलेल्या लोकांची चौकशी केल्यास मोठे सत्य समोर येईल,” असे रोहित पवार यांनी ठामपणे सांगितले. जोपर्यंत या प्रकरणातील ‘मास्टरमाइंड’ समोर येत नाही आणि त्या गूढ फाईलचे सत्य उघड होत नाही, तोपर्यंत आपला लढा सुरूच राहील, असा इशाराही त्यांनी दिला आहे. रोहित पवारांच्या या आक्रमक पवित्र्यामुळे आता राज्य सरकार आणि तपास यंत्रणांना या प्रकरणाकडे गांभीर्याने पहावे लागणार आहे.