विशेष प्रतिनिधी, मुंबई:चंदेरी दुनियेचे झगमगाटी आयुष्य जगणाऱ्या हजारो कलाकार आणि पडद्यामागे दिवसरात्र राबणाऱ्या तंत्रज्ञांच्या आयुष्यात आता एक मोठी कायदेशीर क्रांती होणार आहे. सिने कलाकारांसाठी राज्य सरकार लवकरच एक स्वतंत्र आणि कडक नियमावली तयार करणार असल्याची महत्त्वपूर्ण घोषणा कामगार मंत्री आकाश फुंडकर यांनी केली आहे. मंत्रालयात पार पडलेल्या एका हाय-प्रोफाईल बैठकीत चित्रपटसृष्टीतील कामाचे तास, वेतन सुरक्षा आणि विम्याचे कवच यांसारख्या गंभीर मुद्द्यांवर चर्चा करण्यात आली. यामुळे केवळ पडद्यावर दिसणारे चेहरेच नव्हे, तर चित्रपटसृष्टीचा कणा असलेल्या सामान्य कामगारांनाही आता न्याय मिळणार का, याकडे सर्वांचे लक्ष लागले आहे.
कामगार मंत्री आकाश फुंडकर यांच्या अध्यक्षतेखाली झालेल्या या बैठकीला बॉलीवूडच्या प्रसिद्ध अभिनेत्री पद्मिनी कोल्हापुरे आणि पूनम ढिल्लो यांनी ‘सिंटा’ (Cintaa) संघटनेचे प्रतिनिधित्व करत उपस्थिती लावली. नवीन कामगार संहितेच्या (Labour Code) चौकटीत राहून कलाकारांची सामाजिक सुरक्षा आणि आर्थिक हित जपण्यासाठी सरकारने आक्रमक पवित्रा घेतला आहे. “सिने क्षेत्रातील कामगारांना पडद्यामागील संघर्षात एकटे सोडले जाणार नाही. त्यांच्यासाठी तयार करण्यात येणाऱ्या नियमावलीचा मसुदा लवकरच जाहीर करून क्षेत्रातील तज्ज्ञांच्या सूचनांनुसार त्याला अंतिम स्वरूप दिले जाईल,” असे आश्वासन मंत्री फुंडकर यांनी यावेळी दिले.
चित्रपटसृष्टीत काम करणाऱ्या तंत्रज्ञ, सहाय्यक आणि कनिष्ठ कलाकारांना अनेकदा विम्याअभावी किंवा अनिश्चित कामाच्या तासांमुळे मोठ्या संकटांना सामोरे जावे लागते. अभिनेत्री पद्मिनी कोल्हापुरे आणि पूनम ढिल्लो यांनी या समस्यांचा पाढाच मंत्र्यांसमोर वाचला. यावर सकारात्मक प्रतिसाद देत, राज्य सरकारने आता या घटकांसाठी विशेष कल्याणकारी योजना आणि विम्याची तरतूद करण्याचे संकेत दिले आहेत. ग्लॅमरच्या दुनियेतील कामगारांना आता कायदेशीर संरक्षणाचे कवच मिळणार असल्याने, या निर्णयाचे संपूर्ण मनोरंजन विश्वातून स्वागत केले जात आहे.