नवी दिल्ली, विशेष प्रतिनिधी:बारामती विमानतळावर २८ जानेवारी रोजी झालेल्या ज्या विमान अपघातात माजी उपमुख्यमंत्री अजित पवार यांचा अंत झाला, त्या घटनेने आता पूर्णपणे वेगळे वळण घेतले आहे. हा केवळ एक अपघात नसून त्यामागे अत्यंत मोठा आणि खोलवर रचलेला ‘घातपात’ असल्याचा दावा करत आमदार रोहित पवार यांनी थेट देशाच्या राजधानीत दिल्लीत मोठी खळबळ उडवून दिली आहे. आज झालेल्या त्यांच्या तिसऱ्या पत्रकार परिषदेत त्यांनी मांडलेले मुद्दे केवळ खळबळजनक नसून, त्यांनी थेट केंद्रीय नागरी विमान वाहतूक मंत्री किंजरापू राममोहन नायडू यांच्या राजीनाम्याची मागणी केल्याने राजकीय वर्तुळात भूकंप आला आहे.

रोहित पवार यांनी उपस्थित केलेल्या शंका या अत्यंत गंभीर आहेत. विमानाचा वैमानिक, विमानाची इंधन टाकी आणि प्रत्यक्ष अपघाताची वेळ या सर्व गोष्टींकडे पाहत हा एक व्यापक कट असल्याचे त्यांनी नमूद केले. विशेषतः ज्या VSR कंपनीचे विमान या अपघातात सामील होते, त्या कंपनीच्या मालकाचे सत्ताधारी पक्षातील नेत्यांशी असलेले संबंध तपासाची दिशा भरकटवू शकतात, अशी भीती त्यांनी व्यक्त केली. नागरी उड्डाण मंत्री ज्या पक्षाचे आहेत, त्याच पक्षाचे या कंपनीशी जवळचे नाते असल्याने या प्रकरणाचा तपास निष्पक्ष होईल का, असा रोकडा सवाल त्यांनी विचारला आहे.

एवढेच नव्हे तर, अपघाताला आता काही दिवस उलटून गेल्याने या काळात मूळ पुरावे नष्ट करून खोटी कागदपत्रे तयार केली जात असण्याची शक्यताही रोहित पवारांनी वर्तवली आहे. या संपूर्ण प्रकरणाची तीव्रता पाहता आता खुद्द पंतप्रधान नरेंद्र मोदी आणि गृहमंत्री अमित शहा यांनीच यामध्ये लक्ष घालून सत्य समोर आणावे, अशी आर्त हाक त्यांनी दिली आहे. राहुल गांधी यांनीही या संशयास्पद मृत्यूचा विषय राष्ट्रीय स्तरावर लावून धरावा, अशी विनंती त्यांनी यावेळी केली. अजितदादांच्या निधनाचे हे प्रकरण आता केवळ महाराष्ट्रपुरते मर्यादित न राहता, थेट दिल्लीच्या सत्तेला प्रश्न विचारणारे ठरत आहे.

—
Deepak Kaitke