विशेष प्रतिनिधी | मुंबई:मुंबईच्या इतिहासात गिरण्यांचा काळ हा सुवर्णकाळ मानला जातो. मात्र, काळानुसार शांत झालेल्या या गिरण्यांच्या चिमण्या आता पुन्हा एकदा एका वेगळ्या रूपात जगाचे लक्ष वेधून घेणार आहेत. भायखळ्यातील ऐतिहासिक ‘इंडिया युनायटेड मिल’ च्या जागेवर नेमकं काय उभं राहतंय, याची चर्चा गेल्या अनेक दिवसांपासून मंत्रालयाच्या वर्तुळात होती. आता या गूढारावरून पडदा उठला असून, मुख्यमंत्री देवेंद्र फडणवीस यांच्या पुढाकाराने येथे जागतिक दर्जाचे ‘टेक्सटाईल क्राफ्ट आणि कल्चरल म्युझियम’ साकारण्याचा मार्ग मोकळा झाला आहे.
केवळ संग्रहालय नाही, तर अनुभवाचा खजिना!
हे केवळ भिंतींमधील संग्रहालय नसेल, तर ते एक ‘लिव्हिंग म्युझियम’ असेल. म्हणजे, येथे येणाऱ्या पर्यटकांना मुंबईच्या गिरणी संस्कृतीचा काळ प्रत्यक्ष जगता येणार आहे. सुमारे ४ हजार चौरस मीटर क्षेत्रफळात पसरलेला हा प्रकल्प केवळ कापड उद्योगाचा इतिहास सांगणार नाही, तर तो मुंबईच्या बदलत्या सांस्कृतिक चेहऱ्याचे दर्शन घडवेल.
काय असतील या प्रकल्पाची आकर्षणे?
शिल्प उद्यान आणि आर्ट स्टुडिओ: मोकळ्या जागेत उभारलेली कलात्मक शिल्पे पर्यटकांना आकर्षित करतील.
परफॉर्मन्स स्पेसेस: जिथे लोककला आणि सांस्कृतिक कार्यक्रमांची मेजवानी मिळेल.
विंटेज आणि आधुनिकतेचा संगम: जुन्या गिरणीचा ऐतिहासिक वारसा जतन करून तिथे आधुनिक रेस्टॉरंट्स, कॅफे आणि कार्यशाळा सुरू केल्या जातील.
मोठी भागीदारी, मोठा बदल!
या भव्य प्रकल्पासाठी मुंबई महानगरपालिका, नॅशनल टेक्सटाईल कॉर्पोरेशन (NTC) आणि जेएसडब्ल्यू (JSW) फाउंडेशन यांच्यात एक महत्त्वपूर्ण सामंजस्य करार झाला आहे. विशेष म्हणजे, जेएसडब्ल्यू फाउंडेशन हे काम ‘नो प्रॉफिट’ तत्त्वावर करत आहे. या संग्रहालयातून मिळणारा सर्व महसूल हा याच परिसराच्या देखभालीसाठी आणि सार्वजनिक उपक्रमांसाठी खर्च केला जाणार आहे.
मुख्यमंत्र्यांचा ‘ड्रीम प्रोजेक्ट’ वेगात!
मुंबईतील विस्मृतीत गेलेला वारसा नव्या पिढीसमोर आणण्यासाठी मुख्यमंत्री देवेंद्र फडणवीस यांनी ‘शहरी वारसा संवर्धन’ ही संकल्पना मांडली होती. त्याच संकल्पनेला आता मूर्त स्वरूप मिळत आहे. हा प्रकल्प म्हणजे मुंबईच्या शहरी पुनरुत्थानाचे एक आदर्श उदाहरण ठरेल, असा विश्वास व्यक्त केला जात आहे. “कामात कोणतीही दिरंगाई नको, कालबद्ध नियोजन करून हा प्रकल्प मार्गी लावा,” असे कडक निर्देश मुख्यमंत्र्यांनी सर्व संबंधित विभागांना दिले आहेत.
भायखळ्यातील या जुन्या मिलच्या जागेवर आता कलेचा आणि संस्कृतीचा नवा अध्याय लिहिला जाणार असून, मुंबईकरांसाठी हे एक नवीन ‘हँगआऊट डेस्टिनेशन’ ठरणार आहे.