विशेष प्रतिनिधी | मुंबई:पंतप्रधान नरेंद्र मोदी यांच्या नेतृत्वाखालील भारत आता जागतिक अर्थव्यवस्थेच्या पटलावर केवळ एक देश राहिला नसून, तो एक महासत्ता म्हणून झेप घेण्यासाठी सज्ज झाला आहे. जगातील बलाढ्य ३८ राष्ट्रांसोबत होणाऱ्या मुक्त व्यापार करारांमुळे (FTA) जागतिक व्यापाराचा तब्बल ७० टक्के हिस्सा भारतासाठी खुला होणार असून, यात भारताच्या हिताशी तसूभरही तडजोड केली जाणार नाही, अशी ऐतिहासिक ग्वाही केंद्रीय वाणिज्य व उद्योगमंत्री पीयूष गोयल यांनी शनिवारी मुंबईत दिली. भाजप प्रदेश कार्यालयात आयोजित एका भरगच्च पत्रकार परिषदेत त्यांनी देशाच्या आणि विशेषतः महाराष्ट्राच्या आर्थिक भविष्याचा एक असा आराखडा सादर केला, ज्याने राजकीय आणि व्यापारी वर्तुळात मोठी उत्सुकता निर्माण केली आहे.
या जागतिक करारांच्या केंद्रस्थानी भारतीय शेतकरी असून, त्यांच्या हिताचे रक्षण करण्यासाठी दूध, शेती आणि जीएम फूड यांसारख्या क्षेत्रांना करारातून बाहेर ठेवण्याचे धोरण सरकारने स्वीकारले आहे. “आम्ही जगाचे दरवाजे उघडत आहोत, पण आपल्या घरच्या शेतीला धक्का लागू देणार नाही,” अशा शब्दांत गोयल यांनी टीकाकारांना उत्तर दिले. निर्यात, रोजगार आणि गुंतवणुकीचा महापूर या करारांमुळे देशात येणार असून, आत्मनिर्भर भारताच्या संकल्पात आता कोणतीही शक्ती अडथळा आणू शकणार नाही, असा विश्वास त्यांनी व्यक्त केला.
महाराष्ट्राच्या संदर्भात बोलताना पीयूष गोयल यांनी विकासाची एक मोठी ‘टाईमलाईन’ सादर केली. राज्यातील रेल्वे प्रकल्पांसाठी तब्बल २४ हजार कोटींची अभूतपूर्व तरतूद करण्यात आली असून, पुणे आणि नागपूर या शहरांना ‘ग्रोथ हब’ म्हणून विकसित करण्यासाठी प्रत्येकी ५ हजार कोटींची रसद पुरवण्यात आली आहे. मुंबई-पुणे आणि पुणे-हैदराबाद हायस्पीड रेल्वे, वाढवण बंदर आणि तिसऱ्या विमानतळाच्या कार्यान्वयामुळे महाराष्ट्र हे देशाच्या प्रगतीचे मुख्य केंद्र ठरणार आहे. अर्थसंकल्पाच्या प्रत्येक पैलूमध्ये महाराष्ट्राचे योगदान आणि लाभ प्रतिबिंबित होत असल्याचे त्यांनी नमूद केले.
विरोधकांच्या टीकेचा समाचार घेताना गोयल यांनी काँग्रेसवर कडाडून हल्ला चढवला. “जनतेमध्ये संभ्रम पसरवणे आणि खोट्याचा आधार घेऊन केंद्र सरकारवर टीका करणे यापलीकडे काँग्रेसकडे कोणतीही ठोस योजना उरलेली नाही,” असा टोला त्यांनी लगावला. राहुल गांधी आणि त्यांच्या आघाडीला जनतेने नाकारले असून, नैराश्यातून सुरू असलेले त्यांचे अपप्रचाराचे प्रयत्न यशस्वी होणार नाहीत, असेही त्यांनी स्पष्ट केले. मोदींच्या ‘रिफॉर्म एक्स्प्रेस’मुळे देशात परिवर्तनाची लाट आली असून, स्वातंत्र्याच्या अमृतकाळात विकसित भारताचे स्वप्न महाराष्ट्राच्या साथीने पूर्ण होईल, असा विश्वास व्यक्त करून त्यांनी पत्रकार परिषदेची सांगता केली.