मुंबई, विशेष प्रतिनिधी:महाराष्ट्राच्या राजकारणात विलीनीकरणाच्या चर्चांना उधाण आलेले असतानाच एक मोठी खळबळजनक माहिती समोर येत आहे. अजित पवार यांच्या राष्ट्रवादी काँग्रेसचे किमान १२ आमदार सध्या शरद पवार गटाच्या वरिष्ठ नेत्यांच्या संपर्कात असल्याची खात्रीलायक चर्चा राजकीय वर्तुळात रंगली आहे. अजितदादांच्या निधनानंतर पक्षात निर्माण झालेली नेतृत्वाची पोकळी आणि राजकीय भवितव्याची चिंता, या कारणांमुळे हे आमदार पुन्हा एकदा ‘साहेबांच्या’ सावलीत जाण्यासाठी इच्छुक असल्याचे बोलले जात आहे.

या अंतर्गत घडामोडींमुळे अवघ्या काही दिवसांवर आलेल्या राज्यसभा निवडणुकीची गणिते पूर्णपणे विस्कटण्याची चिन्हे आहेत. राज्यसभेच्या ७ जागांसाठी होणाऱ्या मतदानामध्ये प्रत्येक मत निर्णायक असते. जर हे १२ आमदार विलीनीकरणाच्या मुद्द्यावरून शरद पवारांच्या बाजूने झुकले किंवा त्यांनी मतदानात वेगळी भूमिका घेतली, तर महायुतीला आपल्या हक्काच्या जागा निवडून आणण्यासाठी मोठी कसरत करावी लागणार आहे. विलीनीकरणासाठी शरद पवार गटाकडून अधिकृत प्रस्तावाची प्रतीक्षा असली तरी, पडद्यामागे सुरू असलेल्या या हालचालींनी महायुतीच्या बालेकिल्ल्याला तडे जाण्याची भीती व्यक्त होत आहे.

मुंबईत झालेल्या अजित पवार गटाच्या बैठकीतही विलीनीकरणाच्या मुद्द्यावर आमदारांनी आपली मते मांडल्याचे समजते. शरद पवार यांच्या अनुभवी नेतृत्वाखाली पुन्हा एकत्र काम केल्यास आगामी विधानसभा निवडणुकीत फायदा होईल, असा एक मोठा गट पक्षात सक्रिय झाला आहे. जर राज्यसभा मतदानापूर्वी या १२ आमदारांच्या भूमिकेत बदल झाला, तर महाविकास आघाडीला अनपेक्षितपणे एक अतिरिक्त जागा जिंकण्याची संधी मिळू शकते. पर्यायाने, महायुतीसाठी ही निवडणूक आता केवळ औपचारिक न राहता ‘अस्तित्वाची लढाई’ ठरण्याची शक्यता आहे.

—
Deepak Kaitke