मुंबई | विशेष प्रतिनिधी:शिवसेना (UBT) नेते आणि माजी विरोधी पक्षनेते अंबादास दानवे यांच्या बाबतीत गृहविभागाने एक मोठा प्रशासकीय निर्णय घेतला असून, त्यांना पुरवण्यात आलेली ‘वाय प्लस’ (Y+) दर्जाची सुरक्षा आता अधिकृतपणे काढून घेण्यात आली आहे. सुरक्षा पुनरावलोकन समितीच्या (Security Review Committee) ताज्या अहवालाचा हवाला देत सरकारने हा निर्णय घेतल्याने राजकीय वर्तुळात चर्चेला उधाण आले आहे.

अंबादास दानवे यांचा विधानपरिषदेतील विरोधी पक्षनेतेपदाचा कार्यकाळ संपल्यानंतर त्यांच्या सुरक्षेचा आढावा घेण्यात आला होता. नियमानुसार, पदाचा कार्यकाळ संपल्यामुळे आणि समितीच्या नवीन अहवालात सुरक्षेच्या धोक्याचे प्रमाण कमी झाल्याचे स्पष्ट झाल्यामुळे गृहविभागाने हे पाऊल उचलले आहे. या निर्णयामुळे आता दानवे यांच्या ताफ्यातील विशेष सुरक्षा रक्षकांचा लवाजमा आणि पोलिसांचे अतिरिक्त कवच हटवले जाणार आहे.

विरोधकांचा आवाज दाबण्यासाठी किंवा सूडबुद्धीने ही कारवाई केली गेल्याचा आरोप आता ठाकरे गटाकडून होण्याची शक्यता वर्तवली जात आहे. मात्र, प्रशासकीय स्तरावर हा केवळ तांत्रिक प्रक्रियेचा भाग असल्याचे स्पष्ट करण्यात आले आहे. दरम्यान, दानवे यांच्या सुरक्षा कपातीनंतर आता इतर कोणत्या माजी मंत्र्यांच्या किंवा नेत्यांच्या सुरक्षेचा आढावा घेतला जातो, याकडे सर्वांचे लक्ष लागले आहे.

—
Deepak Kaitke