विशेष प्रतिनिधी:महाराष्ट्राच्या राजकारणातील ‘भीष्मपितामह’ मानले जाणारे शरद पवार पुन्हा एकदा दिल्लीच्या तख्तावर धडक मारण्यासाठी सज्ज झाले आहेत. राज्यसभा निवडणुकीच्या रणधुमाळीत महाविकास आघाडीने अत्यंत सावधगिरीने आपली चाल खेळली असून, शरद पवारांच्या उमेदवारीवर जवळपास शिक्कामोर्तब झाल्याचे खात्रीलायक वृत्त आहे. उमेदवारी अर्ज भरण्यासाठी हातात अवघे दोन दिवस उरले असताना, मविआच्या या निर्णयाने राजकीय वर्तुळात मोठी खळबळ उडाली आहे.

सुरुवातीला या जागेसाठी मित्रपक्षांमध्ये काहीशी ओढाताण होती, मात्र ‘मातोश्री’वर झालेल्या गुप्त बैठकीत उद्धव ठाकरे यांनी पवारांच्या नावावर आपली पसंती दर्शवली. त्यानंतर दिल्लीतून सोनिया गांधी आणि राहुल गांधी यांच्याशी झालेल्या चर्चेअंती काँग्रेसनेही या प्रस्तावाला हिरवा कंदील दिला आहे. संसदेत भाजपच्या आक्रमक नीतीला रोखण्यासाठी शरद पवारांसारखा अनुभवी आणि मुत्सद्दी चेहरा असणे काळाची गरज असल्याचे मत आघाडीतील नेत्यांनी व्यक्त केले आहे.

एप्रिल २०२६ मध्ये पवारांचा कार्यकाळ संपत असला, तरी आगामी निवडणुकांचा विचार करता त्यांना पुन्हा संधी देऊन मविआने आपली एकजूट दाखवून दिली आहे. १६ मार्चला होणारे मतदान आता केवळ औपचारिकता ठरेल की विरोधक काही नवी खेळी खेळतील, याकडे सर्वांचे लक्ष लागले आहे. तुर्तास, शरद पवारांच्या नावाच्या घोषणेने महाविकास आघाडीच्या कार्यकर्त्यांमध्ये नवा उत्साह संचारला असून, ‘चाणक्य’ नीती पुन्हा एकदा यशस्वी झाल्याची चर्चा रंगू लागली आहे.

—
Deepak Kaitke