बदलापूर, दि.४,प्रतिनिधी:कुळगाव बदलापूर नगरपरिषदेची सार्वत्रिक निवडणूक प्रक्रिया पूर्ण झाली आहे. मात्र नामनिर्देशित सदस्य(स्वीकृत नगरसेवक) आणि उपनगराध्यक्ष पदाकरिता चढाओढ पाहायला मिळणार आहे.येत्या पाच दिवसात ही निवड प्रक्रिया पूर्ण होईल.
कुळगाव-बदलापूर नगरपरिषदेत येत्या ९ जानेवारी रोजी पाच स्वीकृत नगरसेवक आणि उपनगराध्यक्ष पदाची निवड प्रक्रिया पार पडणार असून, यासाठी राजकीय पातळीवर जोरदार तयारी सुरू आहे.नगरपरिषदेच्या नुकत्याच पार पडलेल्या सार्वत्रिक निवडणुकीत शिवसेना (शिंदे गट) २४,भाजप २२,राष्ट्रवादी काँग्रेस (अजित पवार गट) ३ असे नगरसेवक निवडून आले आहेत.या निवडणुकीत भाजप–राष्ट्रवादी–आरपीआय (आठवले) यांची युती होती. युतीदरम्यान उपनगराध्यक्ष पद आणि एक स्विकृत नगरसेवक राष्ट्रवादी अजित पवार गटाला आश्वासन दिले होते.पाच स्वीकृत नगरसेवकांच्या वाटपाबाबतही चित्र स्पष्ट होत असून,शिवसेना (शिंदे गट) २,भाजप २,राष्ट्रवादी (अजित पवार गट)१ अशी विभागणी होण्याची शक्यता वर्तवली जात आहे.९ जानेवारीच्या निवड प्रक्रियेकडे शहराचे लक्ष लागले असून, उपनगराध्यक्ष पदावर कोणाचा शिक्का बसेल याबाबत उत्सुकता शिगेला पोहोचली आहे.
स्वीकृत नगरसेवक होण्यासाठी पात्र व्यक्ती
१)शिक्षण क्षेत्रातील तज्ज्ञ
– माजी मुख्याध्यापक, शिक्षणतज्ज्ञ, प्राध्यापक
२)सामाजिक कार्यकर्ते
– सामाजिक संस्था चालवणारे, समाजसेवक, महिला/युवा कार्यकर्ते
३)कायदा व प्रशासन क्षेत्रातील व्यक्ती
– निवृत्त अधिकारी, कायदेपंडित
४)आरोग्य, कला, साहित्य, क्रीडा क्षेत्रातील मान्यवर
– डॉक्टर, कलाकार, लेखक, क्रीडापटू
५) शहर विकास व नागरी समस्यांतील तज्ज्ञ
– नगररचना, पर्यावरण, पाणीपुरवठा आदी विषयांतील जाणकार
महत्त्वाच्या अटी
स्वीकृत नगरसेवक थेट निवडणूक लढवत नाही.त्यांची निवड नगरपरिषदेत बहुमत असलेल्या पक्षांच्या शिफारसीने होते.त्यांना मतदानाचा अधिकार असतो, मात्र काही ठिकाणी स्थायी समिती अध्यक्षपदास मर्यादा असू शकतात.एकूण स्वीकृत नगरसेवकांची संख्या ५ असते.