४० देशांतील १७१ सायकलिस्ट सहभागी
पुणे दि. १८ प्रतिनिधी:सायकलिंग फेडरेशन ऑफ इंडिया यांच्यासह पुणे जिल्हा प्रशासन यांच्या वतीने शहरात ‘पुणे ग्रँड चॅलेंज टूर’ या सायकलिंग स्पर्धेचे १९ ते २४ जानेवारी दरम्यान आयोजन केले आहे. सोमवारी (दि. १९) या स्पर्धेचे उद्घाटन होणार असून, यानिमित्त फर्ग्युसन कॉलेज रोड (एफसी रोड) आणि जंगली महाराज रोड (जेएम रोड) सकाळी ९ ते संध्याकाळी ६ वाजेपर्यंत बंद राहणार आहेत. तसेच या रस्त्यांना जोडणारे उपरस्ते देखील बंद राहणार असल्याची माहिती पोलिस सहआयुक्त रंजन कुमार शर्मा यांनी दिली. यावेळी अपर पोलिस आयुक्त मनोज पाटील, वाहतुक शाखेचे उपायुक्त हिम्मत जाधव यांची उपस्थिती होती.
आजपासून सुरू होणाऱ्या पुणे ग्रँड टुर २०२६ या सायकलिंग स्पर्धेसाठी ४० देशांतील १७१ सायकलिस्ट सहभागी होणार आहेत. त्यानिमित्त शासन स्तरावरील सर्व तयारी पूर्ण झाली असून, देशात पहिल्यांदाच अशाप्रकारचा मोठा इव्हेंट पार पडणार आहे. ४० देशांमध्ये या स्पर्धेचे लाईव्ह प्रक्षेपण होणार असून, शहराच्या नावलौकीकात आणखी भर पाडणारा हा इव्हेंट असेल, असे मत सहपोलिस आयुक्त शर्मा यांनी व्यक्त केले. सोमवारी या स्पर्धेनिमित्त शहराच्या मध्यवर्ती व पश्चिम भागातील शैक्षणिक संस्था देखील बंद राहणार असल्याचे त्यांनी सांगितले.
