विशेष प्रतिनिधी:राज्यातील खराब रस्ते आणि रखडलेल्या प्रकल्पांवरून जनतेमध्ये असलेल्या नाराजीची दखल घेत सार्वजनिक बांधकाम मंत्री शिवेंद्रसिंहराजे भोसले यांनी प्रशासकीय यंत्रणेला कामाला लावले आहे. “अतिवृष्टीमुळे खराब झालेल्या रस्त्यांची आणि पुलांची दुरुस्ती हे आमचे पहिले प्राधान्य असेल. विशेषतः धार्मिक आणि पर्यटन स्थळांकडे जाणाऱ्या मार्गांवर प्रवाशांची गैरसोय खपवून घेतली जाणार नाही,” अशा कडक शब्दांत त्यांनी अधिकाऱ्यांना बजावले. मंत्रालयात झालेल्या बांधकाम विभागाच्या बैठकीत त्यांनी राज्याच्या रस्ते विकासाचा सविस्तर आढावा घेतला.

नाशिक कुंभमेळ्यासाठी ‘मिशन मोड’वर काम

पुढील वर्षी होणारा नाशिक कुंभमेळा हा राज्यासाठी प्रतिष्ठेचा विषय आहे. या पार्श्वभूमीवर, शहराला जोडणारे सर्व द्रुतगती मार्ग, रेल्वे स्थानके आणि विमानतळांकडे जाणारे रस्ते तात्काळ पूर्ण करण्याचे आदेश त्यांनी दिले आहेत. भाविकांची विक्रमी गर्दी पाहता वाहतूक कोंडी होऊ नये, यासाठी पायाभूत सुविधांचा विकास वेळेत पूर्ण करण्यावर त्यांचा भर आहे. नाशिक परिक्रमा मार्गासह पुणे-शिरूर आणि तळेगाव-चाकण-शिक्रापूर यांसारख्या वर्दळीच्या मार्गांच्या कामांना गती देण्याचे निर्देशही त्यांनी दिले.

पावसाचा धोका ओळखून ‘स्मार्ट’ रस्ते बांधणी

नेहमीप्रमाणे रस्ते बांधण्याऐवजी आता आधुनिक तंत्रज्ञानाचा वापर करण्याच्या सूचना मंत्र्यांनी दिल्या आहेत. ज्या भागात अतिवृष्टी होते किंवा जे भाग डोंगराळ आहेत, तिथे रस्ते दीर्घकाळ टिकावेत यासाठी विशेष तांत्रिक निकष निश्चित करण्यात आले आहेत. रस्त्यांचे आयुष्य वाढवण्यासाठी निकृष्ट दर्जाचे काम करणाऱ्यांवर कारवाई करण्याचे संकेतही त्यांनी दिले आहेत.

महिला प्रवाशांच्या सुरक्षिततेसाठी मोठा निर्णय

राज्यातील प्रमुख महामार्गांवर प्रवास करणाऱ्या महिलांसाठी एक दिलासादायक बातमी आहे. सर्व महत्त्वाच्या रस्त्यांवर महिलांसाठी स्वतंत्र आणि सुसज्ज स्वच्छतागृहे तसेच प्रसाधनगृहे उभारण्याचे आदेश शिवेंद्रसिंहराजे यांनी दिले आहेत. स्वच्छतेच्या सोयीअभावी प्रवासात होणारी महिलांची कुचंबणा थांबवण्यासाठी हे पाऊल उचलण्यात आले आहे.

हायब्रीड ॲन्युटी आणि रोपवे प्रकल्पांना गती

राज्यातील १०,००० किलोमीटर लांबीच्या रस्त्यांच्या सुधारणेसाठी ‘हायब्रीड ॲन्युटी’ मॉडेलचा वापर केला जाणार आहे. तसेच, भीमाशंकर ते कर्जत या नवीन मार्गामुळे प्रवासाचे अंतर कमी होणार असून या प्रकल्पाच्या नियोजनाचाही आढावा घेण्यात आला. केंद्र सरकारच्या ‘पर्वतमाला’ योजनेतून प्रस्तावित असलेल्या रोपवे प्रकल्पांमुळे राज्यातील पर्यटन स्थळांचे आकर्षण वाढणार असून, या कामांना तातडीने चालना देण्याचे आदेश देण्यात आले आहेत.

या बैठकीस अपर मुख्य सचिव मिलिंद म्हैसकर यांच्यासह विभागाचे सचिव व वरिष्ठ अधिकारी उपस्थित होते. मंत्र्यांच्या या आक्रमक पवित्र्यामुळे राज्यातील प्रलंबित रस्ते कामांना आता गती मिळण्याची चिन्हे आहेत.

—
Deepak Kaitke