मुंबई, विशेष प्रतिनिधी:चंद्रपूर महानगरपालिकेच्या राजकारणावरून काँग्रेसचे दोन दिग्गज नेते, विजय वडेट्टीवार आणि खासदार प्रतिभा धानोरकर यांच्यात सुरू असलेला कलह आता विकोपाला गेला आहे. या अंतर्गत वादामुळे पक्षाच्या प्रतिमेचे आणि संघटनेचे मोठे नुकसान होत असल्याची गंभीर दखल काँग्रेस प्रदेश कमिटीने घेतली आहे. या संपूर्ण प्रकरणाची सखोल चौकशी करून त्याचा अहवाल दिल्लीतील हायकमांडकडे पाठवण्याचा निर्णय घेण्यात आला असून, दोषींवर कडक कारवाईचे संकेत देण्यात आले आहेत.

पक्षाला फटका बसल्याचा बैठकीत सूर

मुंबईत पार पडलेल्या काँग्रेसच्या वरिष्ठ नेत्यांच्या बैठकीत चंद्रपूरमधील परिस्थितीवर सविस्तर चर्चा करण्यात आली. वडेट्टीवार आणि धानोरकर या दोन्ही नेत्यांमधील समन्वयाच्या अभावामुळे महानगरपालिका क्षेत्रात पक्षाची पकड ढिली होत असल्याचा सूर या बैठकीत उमटला. नेत्यांमधील या संघर्षामुळे कार्यकर्त्यांमध्ये दोन गट पडले असून, त्याचा नकारात्मक परिणाम आगामी निवडणुकांवर होऊ शकतो, अशी भीती व्यक्त करण्यात आली आहे.

हायकमांड घेणार अंतिम निर्णय

या प्रकरणाचे गांभीर्य लक्षात घेऊन काँग्रेस पक्षाने दोन्ही नेत्यांची बाजू ऐकून घेण्यासाठी आणि वादाची मूळ कारणे शोधण्यासाठी चौकशी समिती नियुक्त करण्याचे ठरवले आहे. या चौकशीचा प्राथमिक अहवाल तयार करून तो थेट राष्ट्रीय अध्यक्ष मल्लिकार्जुन खर्गे आणि राहुल गांधी यांच्याकडे सोपवला जाणार आहे. पक्षाच्या शिस्तीचे उल्लंघन करणाऱ्या आणि गटबाजीला खतपाणी घालणाऱ्या नेत्यांवर कारवाई करण्याबाबत दिल्लीतून काय आदेश येतात, याकडे आता सर्वांचे लक्ष लागले आहे.

—
Deepak Kaitke