मालेगाव: भाजपचे फायरब्रँड नेते आणि माजी खासदार किरीट सोमय्या आज अचानक मालेगावात दाखल झाल्याने राजकीय वर्तुळात मोठी खळबळ उडवून दिली आहे. आधी अप्पर जिल्हाधिकारी कार्यालय आणि त्यानंतर थेट अप्पर पोलीस अधीक्षक कार्यालयात सोमय्या यांनी धाव घेतल्याने, मालेगावातील काही बड्या नेत्यांचे धाबे दणाणले आहेत. या भेटीमागे ‘बनावट जन्म दाखल्यांचे’ मोठे रॅकेट असल्याचा संशय व्यक्त केला जात असून सोमय्या आता कोणाचा ‘हिशोब’ चुकता करणार, याकडे सर्वांचे लक्ष लागले आहे.
पोलीस अधीक्षकांच्या दालनात खलबते
किरीट सोमय्या यांनी मालेगावचे अप्पर पोलीस अधीक्षक यांची भेट घेऊन बराच वेळ चर्चा केली. सूत्रांनी दिलेल्या माहितीनुसार, मालेगावात मोठ्या प्रमाणावर बनावट जन्म दाखले बनवले जात असून, त्याचा वापर करून काही व्यक्तींनी प्रशासकीय आणि राजकीय लाभ उठवल्याची तक्रार सोमय्या यांनी केली आहे. या संदर्भातील काही महत्त्वाचे पुरावे देखील त्यांनी पोलीस प्रशासनाकडे सोपवल्याचे समजते.
अप्पर जिल्हाधिकाऱ्यांकडेही केली होती विचारणा
पोलीस कार्यालयात जाण्यापूर्वी सोमय्या यांनी अप्पर जिल्हाधिकारी कार्यालयालाही भेट दिली होती. महसूल विभागाच्या अखत्यारीत येणाऱ्या या प्रकरणाची व्याप्ती मोठी असल्याचे संकेत त्यांनी दिले आहेत. बनावट दाखल्यांच्या माध्यमातून नेमकी कोणाची ‘सोय’ लावली जात आहे, याचा पर्दाफाश करण्यासाठी सोमय्या मैदानात उतरल्याने मालेगावच्या राजकारणात आता धुराळा उडणार हे निश्चित झाले आहे.
पुढचा ‘टार्गेट’ कोण?
किरीट सोमय्या जेव्हा जेव्हा एखाद्या शहराचा दौरा करतात, तेव्हा तेव्हा कोणाचे तरी ‘कौतुक’ होणार हे ठरलेले असते. मालेगावातील या बनावट कागदपत्रांच्या प्रकरणाचे धागेदोरे कोणापर्यंत पोहोचतात आणि यामध्ये कोणत्या बड्या राजकीय नेत्याचे नाव समोर येते, याची उत्सुकता आता शिगेला पोहोचली आहे. “भ्रष्टाचाराचा आणि फसवणुकीचा हा खेळ आता थांबला पाहिजे,” असा सूचक इशारा देत सोमय्या यांनी आपल्या पुढील रणनीतीचे संकेत दिले आहेत.
सोमय्यांच्या या ‘व्हिजिट’ नंतर मालेगाव पोलीस आता या बनावट दाखल्यांच्या प्रकरणात नेमकी काय कारवाई करतात, याकडे संपूर्ण जिल्ह्याचे लक्ष लागले आहे.