बदलापूर, दि.६,प्रतिनिधी:एकीकडे महापालिकांची रणधुमाळी सुरु असताना बदलापूरच्या राजकारणात मोठी उलथापालथ घडली असून मनसेच्या महिला शहर अध्यक्षा संगीता चेंदवणकर यांनी राष्ट्रवादी काँग्रेस पक्षात (अजित पवार ) अधिकृत प्रवेश केला आहे.या पक्षप्रवेशामुळे बदलापूरच्या राजकीय वर्तुळात खळबळ उडाली आहे.

हा पक्षप्रवेश सोहळा राज्यमंत्री दर्जा असलेले परशुराम आर्थिक विकास महामंडळाचे अध्यक्ष कॅप्टन आशिष दामले यांच्या प्रमुख उपस्थितीत पार पडला. यावेळी बदलापूर शहर राष्ट्रवादी काँग्रेस पक्षाचे अध्यक्ष प्रभाकर पाटील, नगरसेविका प्रियांका दामले, हर्षाली गायकवाड, सुगंधा पाटील यांच्यासह पक्षाचे पदाधिकारी व कार्यकर्ते मोठ्या संख्येने उपस्थित होते.
बदलापूरच्या रणरागिणीचा राष्ट्रवादीत प्रवेश
यावेळी बोलताना कॅप्टन आशिष दामले म्हणाले,
“बदलापूरच्या रणरागिणी म्हणून ओळख असणाऱ्या संगीता ताई चेंदवणकर यांनी राष्ट्रवादी काँग्रेस पक्षात प्रवेश केला आहे. बदलापूरमध्ये कुठलाही अन्याय झाला, सर्वसामान्य नागरिकांना त्रास झाला किंवा सामाजिक प्रश्न निर्माण झाला, तर सर्वप्रथम ज्यांचे नाव आठवते ते म्हणजे संगीता चेंदवणकर.ते पुढे म्हणाले,”गेल्या अनेक वर्षांत त्यांनी लोकांचे प्रश्न सोडवण्यासाठी प्रामाणिकपणे काम केले. अर्ध्या रात्री फोन आला तरी त्या लोकांसाठी धावून जात होत्या. आदरणीय अजित दादा पवार यांच्या नेतृत्वाखाली त्यांनी राष्ट्रवादी काँग्रेस पक्षात प्रवेश केला, याचा मला मनापासून आनंद आहे.”
नुकत्याच झालेल्या नगरपरिषद निवडणुकीचा उल्लेख करत दामले म्हणाले,
“शहराध्यक्ष प्रभाकर पाटील, युतीतील पदाधिकारी आणि कार्यकर्त्यांनी प्रचंड मेहनत घेतली. युतीतून फक्त ८ जागा लढवूनही राष्ट्रवादी काँग्रेस पक्षाला तब्बल १८,३४९ मते मिळाली. विशेष म्हणजे आमच्या ३ महिला नगरसेविका निवडून आल्या. आता संगीता ताई आल्याने महिला ताकद अधिक मजबूत झाली आहे.”
आगामी थेट नगराध्यक्ष निवडणुकीबाबत ते म्हणाले,
“आईची प्रकृती गंभीर असतानाही संगीता ताईंना मोठ्या प्रमाणात मते मिळाली, ही त्यांच्या कामाची पावती आहे. त्यांच्या अनेक वर्षांच्या सामाजिक कार्याला राष्ट्रवादी काँग्रेस पक्ष योग्य दिशा देईल आणि आम्ही खंबीरपणे त्यांच्या पाठीशी उभे राहू.”
मुक्त विचारांची असल्याने दबावाखाली काम शक्य नव्हते
पक्षप्रवेशानंतर बोलताना संगीता चेंदवणकर यांनी आपल्या निर्णयामागची भूमिका स्पष्ट केली. त्या म्हणाल्या,
“मी मुक्त विचारांची असल्याने कोणाच्याही दबावाखाली काम करू शकत नव्हते. त्यामुळे मी हा निर्णय घेतला. पर्याय म्हणून राष्ट्रवादी काँग्रेस पक्ष मला खूप चांगला वाटला.”
निवडणुकीच्या काळातील अनुभव सांगताना त्या म्हणाल्या,
“बदलापूर शहरातील निवडणुकांदरम्यान एका बड्या नेत्याकडून दोन्ही पक्ष कशा पद्धतीने चालवले जात होते, हे बदलापूरकरांनी पाहिले आहे. त्या काळात माझी जी गळचेपी झाली ती अत्यंत भयानक होती. एखाद्या कार्यकर्त्यावर अशी वेळ येऊ नये.”
त्या काळात आई आजारी असल्याची आठवण करून देत त्या म्हणाल्या,
“माझी आई गंभीर आजारी होती. अशा परिस्थितीत बदलापूरकरांनी मला जे मताधिक्य दिले, ते माझे हक्काचे मत होते. ती कोणत्याही पक्षाची मते नव्हती. मी ज्या पदावर काम केले, लोकांना न्याय देण्याचा प्रयत्न केला, त्या कामाची ती पोचपावती होती.”
आशिष दामले यांच्याशी झालेल्या चर्चेचा उल्लेख करत त्या म्हणाल्या,
“दामले साहेबांनी मला सांगितले की तुमचा वीस वर्षांचा संघर्ष आम्ही पाहिला आहे आणि येथे काम करताना तुम्हाला कोणतीही अडचण येणार नाही. त्यामुळे राज्यातील, ठाणे जिल्ह्यातील आणि बदलापूर शहरातील एकूण राजकारण पाहता राष्ट्रवादी काँग्रेस पक्ष हाच योग्य पर्याय असल्याचा निर्णय मी घेतला.”