विशेष प्रतिनिधी:अकोला जिल्ह्यातील अकोट शहरात सध्या एका रहस्यमयी महिलेने व्यापाऱ्यांची झोप उडवली आहे. चेहऱ्यावर स्कार्फ बांधून येणारी ही महिला हुबेहूब खऱ्या दिसणाऱ्या ५०० आणि १०० रुपयांच्या बनावट नोटा बाजारात पसरवत असल्याचे धक्कादायक वास्तव समोर आले आहे. या प्रकारामुळे संपूर्ण अकोला जिल्ह्यात खळबळ उडाली असून, यामागे बनावट नोटांचे एखादे मोठे रॅकेट कार्यरत आहे का? असा प्रश्न आता उपस्थित होत आहे.
भरबाजारात व्यापाऱ्यांची फसवणूक
अकोटमधील गजबजलेल्या नरसिंग महाराज रोडवर चप्पल दुरुस्तीचा व्यवसाय करणाऱ्या एका छोट्या दुकानदाराला या ‘स्कार्फवाली’ महिलेने आपले सावज बनवले. गर्दीचा फायदा घेत या महिलेने ५०० आणि १०० रुपयांच्या नोटा देऊन व्यवहार केला. बिचाऱ्या दुकानदाराला या फसवणुकीचा पत्ता दुसऱ्या दिवशी लागला, जेव्हा त्याने नोटांची नीट तपासणी केली. ५०० रुपयांची ती नोट बनावट असल्याचे स्पष्ट होताच परिसरात एकच खळबळ उडाली.
जुनाच ‘पॅटर्न’ पुन्हा सक्रिय?
धक्कादायक बाब म्हणजे, हा प्रकार अकोटमध्ये पहिल्यांदाच घडलेला नाही. यापूर्वी २० जुलै २०२५ रोजी सुद्धा श्रीराम सुपर शॉपीमध्ये एका महिलेने अशाच प्रकारे ५०० रुपयांच्या बनावट नोटा देऊन दुकानदाराला गंडवले होते. वर्षभराच्या कालावधीनंतर पुन्हा तोच ‘पॅटर्न’ आणि तशाच वर्णनाची महिला समोर आल्याने बनावट नोटांचे रॅकेट अकोल्यात पुन्हा एकदा डोके वर काढत असल्याचे स्पष्ट होत आहे. विशेषतः रस्ते विक्रेते आणि छोट्या व्यावसायिकांना ही टोळी लक्ष्य करत आहे.
गर्दीचा फायदा आणि ‘स्कार्फ’चे गुपित
आतापर्यंत समोर आलेल्या प्रकरणांमध्ये एक साम्य आढळले आहे, ते म्हणजे बनावट नोटा चलनात आणण्यासाठी महिलांचा वापर केला जात आहे. ओळखी पटू नये म्हणून या महिला चेहऱ्यावर स्कार्फ बांधून येतात, ज्यामुळे सीसीटीव्ही कॅमेऱ्यातही त्यांची ओळख पटवणे कठीण जात आहे. ५०, १०० आणि ५०० रुपयांच्या या नोटा इतक्या हुबेहूब छापल्या आहेत की, सर्वसामान्यांना त्यातील फरक ओळखणे जवळपास अशक्य होत आहे.
या प्रकारामुळे व्यापाऱ्यांमध्ये भीतीचे वातावरण असून, पोलीस आता या प्रकरणाचा सखोल तपास करत आहेत. हे रॅकेट फक्त अकोल्यापुरते मर्यादित आहे की राज्याच्या इतर भागातही पसरले आहे, हे पाहणे आता महत्त्वाचे ठरेल.